Əsas səhifə   |   

Tarix   |   

Əlaqə   |   

Saytın xəritəsi


XƏBƏRLƏR



BAKIDA “SƏNAYE ÖHDƏLİKLƏRİ: ARXEOLOGİYA VƏ MƏDƏNİ İRSƏ TÖHFƏ” MÖVZUSUNDA BEYNƏLXALQ SİMPOZİUM TƏŞKİL OLUNUB

  29.11.2019

Noyabrın 28-də Daş Salnamə Muzeyində “Sənaye öhdəlikləri: arxeologiya və mədəni irsə töhfə” mövzusunda beynəlxalq simpozium təşkil olunub.
Tədbir Heydər Əliyev Fondunun təşəbbüsü, “BP Azerbaijan”, “İçərişəhər” Dövlət Tarix-Memarlıq Qoruğu İdarəsi, “AzerGold” Qapalı Səhmdar Cəmiyyəti və Avstriyanın “Atelier Erich Pummer” şirkətinin təşkilatçılığı ilə keçirilib.
Simpoziumun məqsədi müxtəlif müəssisə və təşkilatların mədəni irsin qorunması istiqamətində həyata keçirdikləri layihələrin ictimaiyyətə təqdim edilməsi, bu sahədə görülən işlərə dair təcrübə mübadiləsi, eyni zamanda qazıntı işləri zamanı üzə çıxarılan arxeoloji tapıntıların daha dərindən öyrənilməsi və təbliğidir.
Tədbirdə çıxış edən “BP Azerbaijan” şirkətinin əlaqələr, xarici işlər və strategiya üzrə vitse-prezidenti Bəxtiyar Aslanbəyli təmsil etdiyi qurum barəsində məlumat verib, həyata keçirilən layihələrdən danışıb. Bildirib ki, şirkətin daxilində mədəni irsin qorunması planı mövcuddur. Qeyd edib ki, “BP” şirkəti neft boruların quraşdırılması zamanı və digər tikinti işləri apararkən arxeoloji tapıntılarla üzləşir. Ümumilikdə 23 min artefakt aşkar olunub: “Bu bizim tarixi irsimizdir, bir növ milli pasportumuzdur. İrsimizi gələcək nəsillərə ötürmək hamımızın borcudur. Çünki tarixi tapıntıların qiyməti xərclənən vəsaitdən daha vacibdir”.
“İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Əsgər Ələkbərov bildirib ki, İçərişəhər dünya mədəniyyətimin ayrılmaz bir hissəsidir. Üç min əhalisi olan İçərişəhər insanların yaşadığı və turistlərin ziyarət etdiyi bir məkandır. Azərbaycan mədəni irsinin qorunub saxlanılması və təbliği ölkə başçısının daima diqqət mərkəzindədir. Bununla bağlı İçərişəhərdə ötən əsrin 60-cı illərindən başlayaraq irimiqyaslı qazıntı işləri aparılıb və üç mədəni təbəqənin mövcudluğu müəyyən edilib. Bildirib ki, 2016-cı ildə başlanan qazıntılar zamanı Qoşa Qala Qapısı yanında XVII əsrə aid və dövrümüzə dəyişilməz halda çatan hamam və Bakı xanlarının evi tapılıb. Qeyd edib ki, hazırda bu tikililərin restavrasiyası davam etdirilir və işlər başa çatdıqdan sonra ərazi abadlaşdırılaraq ziyarətçilərin ixtiyarına veriləcək.
“AzerGold” Qapalı Səhmdar Cəmiyyətinin İdarə Heyətinin sədri Zakir İbrahimov bildirib ki, təmsil etdiyi şirkətin fəaliyyəti əlvan metalların keyfiyyəti, hasilatı və emalından ibarətdir. Qeyd edib ki, “AzerGold” QSC AMEA-nın Arxeologiya və Etnoqrafiya İnstitutu ilə əməkdaşlıq edir: “Qazıntılar zamanı təqribən 6 min eksponat aşkarlanıb və laborator analizə göndərilib”.
Gürcüstan Milli Muzeyinin direktoru David Lordkipanidze konfransda iştirakından məmnunluğunu ifadə edib: “Heydər Əliyev Fondunun gördüyü işlər əvəzsizdir. Bizim Muzeyin Azərbaycanla əməkdaşlıq etməsi əlbəttə ki, çox sevindiricidir. Əsas tərəfdaşımız “BP” şirkətidir, ancaq Bakı–Tbilisi–Ceyhan əsas ixrac neft boru kəməri olmasaydı bizim onlarla əməkdaşlığımız mümkün olmazdı”.
AMEA Arxeologiya və Etnoqrafiya İnstitutunun direktoru, tarix elmləri doktoru, professor Maisə Rəhimova çıxışında son dövrlərdə apaprılan arxeoloji tədqiqatlar və arxeoloji ekspedisiyaların təşkilində və fəaliyyətində Heydər Əliyev Fondunun və BP şirkətinin göstərdiyi önəmli dəstəyə toxundu.
Sonra konfrans işini plenar sessiyalarla davam etdirib. AMEA Arxeologiya və Etnoqrafiya İnstitutunun elmi işlər üzrə direktor müavini, tarix elmləri doktoru, professor Nəcəf Müseyiblinin “Azərbaycanda ixrac boru kəmərlərinin marşrutu boyu arxeoloji abidələrin araşdırılması”, İnstitutun şöbə müdiri, tarix üzrə fəlsəfə doktoru Səfər Aşurovun “Çovdar nekropolu”, Gürcüstan Milli Muzeyinin direktoru, professor, doktor David Lordkipanidzenin “Gürcüstan Milli Muzeyində həyata keçirilən layihələrin icmalı”, İçərişəhər Dövlət Tarix_memarlıq Qoruğu İdarəsinin Elm və mədəni irsin təbliğ edilməsi sektoru üzrə baş məsləhətçi Kamil İbrahimovun “Ətraf arxeologiyasının xilas edilməsi və İçərişəhərdə arxeoloji turizmin inkişaf etdirilməsinə dair tədqiqat”, O.Lordkipanidze ad. Arxeologiya İnstitutunun rəhbəri, Gürcüstan Milli Muzeyinin əməkdaşı doctor Zurab Maxaradzenin “Böyük Ananuri kurqanı № 3: Gürcüstanın şərq hissəsində erkən tunc dövrünə aid kurqan və digər mövzularda məruzələri dinlənilib.
Tədbir çərçivəsində, həmçinin qazıntılar zamanı aşkarlanmış maddi-mədəni irs nümunələrindən ibarət xüsusi ekspozisiyanın açılışı olub. Sərgi-ekspozisiya 6 ay müddətində Daş Salnamə Muzeyində nümayiş etdiriləcək.