Arxeologiya və Antropologiya İnstitutu Türk ölkələrinin tarixi üzrə akademik əsərin yaradılmasında iştirak edəcək

24 fevral 2025-ci il tarixində Atatürk Mədəniyyət, Dil və Tarix Yüksək Qurumunun Kampusunda “Türk Dünyası Tarixi Seminarı” (“Türk Dünyası Tarihi Çalıştayı”) keçirilmişdir. Seminarda Türk Dövlətləri Təşkilatının Ağsaqqallar Şurasının sədri Bineli Yıldırım, Yüksək Qurumun prezidenti səfir, prof. Dr. Derya Örs, Türk Akademiyasının prezidenti Prof. Dr. Şahin Mustafayev və Türk Tarix Qurumunun prezidenti Prof. Dr. Yüksel Özgenlə yanaşı, Azərbaycan, Qazaxıstan, Qırğızıstan, Şimali Kipr Türk Cümhuriyyəti, Özbəkistan, Macarıstan və Türkmənistandan da alimlər iştirak ediblər.
Tədbirə ilk dəfə olaraq Türk Dünyası arxeologiya institutlarının rəhbərləri də dəvət olunmuşdular. Dəvətlilər sırasında AMEA Arxeologiya və Antropologiya İnstitutunun direktoru t.ü.f.d., dosent Fərhad Quliyev də təmsil olunmuşdu.
Seminarın açılış iclasında çıxış edən Türk Dövlətləri Təşkilatı Ağsaqqallar Şurasının sədri Binəli Yıldırım bildirdi ki, “türklərin tarixindən, qədim zamanlardan bu günə qədər keçdikləri proseslərdən, hansı dövlətləri qurduqlarından, dünya sivilizasiyasına hansı əsərlər qoyub getdiklərindən bəhs edəcək hərtərəfli toplantıya başlayırıq”. “Bu görüş ortaq türk tariximizi işıqlandıracaq mühüm bir addımdır” – deyə Binəli Yıldıtım vurğuladı.
Atatürk Mədəniyyət, Dil və Tarix Yüksək Qurumunun prezidenti səfir Prof. Dr. Derya Örs çıxışında Türk Dünyasının minilliklərə söykənən köklü tarixi, zəngin mədəni irsi və güclü ictimai quruluşu ilə dünya tarixində mühüm yer tutduğunu bildirib. Qloballaşan dünyada güclü olmağın yolunun birlik və həmrəylikdən keçdiyini deyən Örs çıxışını belə davam etdirdi: “Şübhəsiz ki, dilimiz, tariximiz, mədəniyyətimiz bu birliyi və həmrəyliyi mümkün edəcək. Beləliklə, ortaq əlifba araşdırmalarının göstərdiyi kimi, ortaq tarix araşdırmaları da bizi bir-birimizə yaxınlaşdıracaq”.
Türk Tarix Qurumunun prezidenti Prof. Dr. Yüksel Özgen Türk Dünyası dedikdə 300 milyonluq əhali ilə yanaşı, 4,5 milyon kvadrat kilometr geniş coğrafiya və 4 trilyon dollarlıq iqtisadi gücün, maddi terminlərlə ifadə edilə bilməyən geniş bir tarix, köklü bir mədəniyyət və güclü sivilizasiyanın nəzərdə tutulduğunu vurğuladı.
Beynəlxalq Türk Akademiyasının prezidenti Prof. Dr. Şahin Mustafayev akademik tarixşünaslığın məqsədlərini və layihənin vaxt çərçivəsini vurğulayaraq, bu prosesin 2025-ci ilin sonuna qədər yekunlaşacağını bildirib.
Çıxışlardan sonra Türk Dünyası Tarixinin yazılması üçün görüləcək işlərlə bağlı müzakirələr keçirildi. Görüşün yekununda Türk Dünyası beynəlxalq qurumların, eləcə də tarix və arxeologiya institutlarının rəhbərləri türk ölkələrinin tarixinə dair akademik əsərin yaradılması üzrə birgə işi nəzərdə tutan əməkdaşlıq haqqında protokol imzalayıblar.